Post archive

21st O LE AFIOGATU'UTASIOAIGA JESSICA TAULAGA

by Pelsemgovic Maiava OzNews

O LE TOFÃ IA VAIFALE MISA TAI TAULAGA SA FAAFEILOA’I I LE AU VALAAULIA, ONA SAUNIA AI LEA E LE SUSUGA IA PASTOR SAMAOSO PAPALII MAI LE A.O.G A HURSTVILLE LE SAUNIGA LOTU PU'UPU'U, E FAAMANATUINA AI LE ATOAGA O LE 21 TAUSAGA O LE TAMAITAI IA: AFIOGATU’UTASIOAIGA JESSICA TAULAGA,  I LE AFIAFI O LE ASO FARAILE NA SE’I MAVAE ATU NEI I FAIRFIELD.  NA USUINA FAATASI LE PESE 92 A LE EFKS: O LE FAAFETAI I LE ATUA, FAAFETAI I LONA ALO, FAAFETAI I LE AGAGA PAIA: E SULAINA AI LE ALOFA MATALASI O LE TAPAAU SILI I LE LAGI MA LONA SILISILIESE.

O LE UPU FAAMALOSIAU A LE TAITA'I O LE SAUNIGA PASTOR PAPALII I LE TAMAITA’I FAI ASO FANAU, AEMAISE O SE FAAMANATU FOI I LE PAIA O LE AU VALAAULIA I LEA PO. NA IA AUMAIA AI LE SALAMO A TAVITA: “LO’U AGAGA E, IA E FAAMANU ATU I LE ALII, O MEA UMA FOI O I TOTONU IA TE A’U IA FAAMANU I LONA SUAFA PAIA."

MAE’A LE SAUNIGA ONA FAAGASOLO LEA O LE POLOKALAME A LE MC, LE TAMAITA’I O MOREEN.  O LE FOA’IINA ATU O LE KI O LE 21, NA SAUNIA E LE TINÃ MATUA MAI SAMOA, O LE USO O LE GRANDMA O AFIOGATUUTASIOAIGA TAULAGA. O LE TAMÃ IA VAIFALE  MISA TAI MA LE TINÃ: AFIOGA MULIAGATELE OKETI TAULAGA SA SAUNIA MOLIMAU O JESSICA.

PEI ONA SILAFIA O JESSICA I LONA SUAFA: AFIOGATU’UTASIOAIGA TAULAGA SA AVEA MA SE TAMAITAI NA FILI I AI LE MISS SAMOA O LE TAUSAGA 2015 I LE TAUVAGA O LE LALELEI O SAMOA, MA IA MAUA AI LE FIRST RUNNER UP I LEA TAUSINIOGA SA FAIA I TOTONU O SI O TATOU ATUNUU. E TELE NISI UIGA LELEI MA LE TAUSAAFIA O LE TAMAITA’I FAI ASO FANAU NA FOLASIA I LEA PO, AEMAISE AI O SE AMEPASA FAAMOEMOEINA I TOTONU O LE EKALESIA FAAPEA SI ONA AIGA ATOA. TAIMI NEI O LOO FA’AAUAUINA LE SU’EINA O LONA FAAILOGA B.A. I LE UNIVESETE  AUSTRALIA NATIONAL UNIVERSITY.

SA MATUA MAMAFA FAAFIAFIAGA NA SAUNIA E LE YOUTH A LE AOG A HURSTVILLE FAAPEA LE TAUPOU MANAIA MA LE TELE O AU FAAFIAFIA, AE TAUALUGA E LE UNIVESETE MAI CANBERRA. NA FAAI’UINA FAAFIAFIAGA MA LE FAAMANATUINA O LE 21 O LE AFIOGATU’UTASIOAIGA JESSICA TAULAGA I FAAMANUIAGA OFOINA ATU MAI ONA AIGA NÃ LUA FAAPEA UO MA E MASANI. TELE O ONA AIGA SA MALAGA MAI SAMOA, FAAPEA SETETE ESEESE O AUSETALIA NEI. SA AUAI AI FOI LE KONESULA O SAMOA FONOTI MANOGIAMANU FAAPEA LE PERESETE O LE FONO AOAO A TAGATA SAMOA I SYDNEY: AFIOGA LEILUA JERRY MA LE FALETUA IA SITA UESELE. NA AUAI AI FOI SE TASI ALO O LE ATUNUU LE SUSUGA IA PAPALII TUIVASA, O LONA ATALII O TAI TUIVASA; LEA O LOO UMIA LE FUSI O LE A.F.C I TOTONU O AUSETALIA ATOA I TA'AALOGA O LE FAIPELE.

USUINA LO TA NUU NA OU FANAU AI, TATALO FAAMANUIA LE A’OA’O IA FILIPO TÃTÕ MAI LE A.O.G A HURSTVILLE MA TATALA AI LOA LE FILIALII I LE PAIA MA LE MAMALU O SAMOA .

ASO TAALO MO AOGA ASO SA PULEGA SINI SAUTE NSW 2016

O le aso malolo a Ausetalia i le Labour Day, aso Gafua 4 o Oketopa sa faatumulia ai le Amour park i Revesby i taaloga a Aoga aso Sa a le Pulega a Sini Saute. Pulega lenei o loo tausia e le Susuga i le Toeaina ia Rev. Elder Taeipo Malifa ma le faletua ia Sitaua Malifa. Taeipo Malifa o ia o le Toeaina o Mataupu Tau i le Aufaigaluega mai le Matagaluega a Niu Sa Uelese e pei ona suia mai ai le igoa Toeaina Faatonu mai le Komiti Faatonu a le Au Toeaiina o le Ekalesia Faapotopotoga Kerisiano Samoa.

O le taitai fono o Autalavou ma Aoga aso Sa a le Pulega Rev. Tue Lemalu, faafeagaiga EFKS Moorebank sa ia tatalaina i se lotu puupuu ona faagasolo ai lea o le tausinioga. Sa lagolagosua i le faatinoina o taaloga ma galulue faatasi ai le failautusi le tofa ia Ape Folasaitu Nio mai Moorebank ma le tofa ia Tuu'u Faatoafe o le teutupe o Autalavou ma Aoga aso Sa, o le susuga foi i le A'oa'o Fesoasoani mai le EFKS Sydney.


I le laufaliina o le tele o taaloga sa feagai ma le susuga i le A'oa'o Fesoasoani ia Feetau Frank Pritchard mai le EFKS Prestons, le tamaitai ia Ana Leleimalefaga o Canterbury faapea sui taitasi mai Aoga aso Sa o le Pulega a Sini Saute.
E faaiu ane taaloga i lona tuufaatasiga na manumalo aoao ai 1st: Sunday School a Moorebank tausia e Rev. Tue & Tolopo Lemalu, 2nd o Sydney tausia e le Toeaina ia Taeipo & Sitaua Malifa, 3rd o Mascot tausia e Rev. Pasefika & Talalelei Maiava, 4th Prestons tausia Rev. Litala & Levei Tuimaualuga, 5th Canterbury tausia Rev. Iakopo & Faaesea Leleimalefaga, 6th Bankstown tausia Rev. Iele & Faasuka Paulo, 7th St. George tausia e Rev. Mofate & Aliitasi Fuimaono, ma e le'i auai le aoga aso Sa a Condell Park lea e tausia Rev. Fiti & Mala Semaia.
Se tasi o ipu mataina na autu i ai Ipu o le tausinioga: Ipu lea o le Maopoopo, ma na autasi ai le susuga i le Toeaina ma Faifeau o le Pulega e tuuina atu i le Aoga aso Sa a Mascot, ona o le lava tapen, matagofie ma Maopoopo le toniga o loo lolomi ai lava le igoa o le Aoga aso Sa faatasi ai ma le fu'a poo le banner o loo tusia ai le motto o Aoga aso Sa a le Ekalesia EFKS Aoao i Samoa ma atunuu mamao e faaupu faapea: "Ia Tupu A'e ia Keriso"
Sa faaiuina i se saunoaga mulimuli a le Toeaina o le Pulega T. Malifa ma tatala ai loa le filialii faatasi ma faamanuiaga ia maua e Aoga aso Sa uma se Lotu Tamaiti fiafia i le aso Sa e sosoo ai 9 o Oketopa 2016.

tula'i: Tie Toomalatai mai Amerika Samoa. nonofo L-R: To'alepai Steve Ofisa Mariner, Gwenn Swann, Rev. P. Maiava-sui ta'ita'i fono & Tanuvasa To'alepai Fouina Ofisa. Sui o le Ekalesia ua taulimaina ma le fiafia le Ipu taua o le tausinioga o le Maopoopo & Amio Pulea!




 

Isaako Junior Patea Loia Samoa i Ausetalia 2010

By: Toomata Polutele Maiava

 

Faauuina Isaako Junior Patea o le Loia Samoa i Sydney Ausetalia

O loimata o le fiafia ma le loifofoga maligi i le faafetai i le Atua sa taufai lagona uma e tagata Samoa i le aai o Sini ma le malo tele o Ausetalia o loo afifio ma papaaao ai soo se Samoa sailimalo, ina ua faamanuiaina se tasi o ana tama fanau i faailoga taualoa faaloia o le Bachelor of Arts ma le Bachelor of Laws (BA,LLB).

O le alii talavou o Isaako Junior Patea 24 tausaga le matua mai le alaalafaga o Sapunaoa Falealili, Maagiagi, Vailoa Palauli ma Salelologa ae o loo aumau i Villawood NSW Ausetalia, sa faauuina i le Univesete o Western Sydney i le aso Lua 21 o Setema i le BA, ae o le aso Tofi 23 o Setema lava i le LLB ina ua mae’a le lima tausaga o lana taumafaiga ma ia taulimaina ai tikeri mo le galuega faaloia i totonu o Ausetalia e galue ai i le lumanai.

O Junior o ona matua o le susuga i le faafeagaiga ia Rev. Isaako Patea mai i ona tuaa o Rev. Iose Patea o Sapunaoa ma le tina ia Pepe mai le afioaga o Maagiagi, ao lona tina o le faletua ia Tavai mai ona matua o le tama ia Aloiai Poufa Pesalaleli mai Salelologa ao le tina o Elisapeta Ekeroma mai Vailoa Palauli.

Sa fanau Isaako Junior i Aukilani Niu Sila ma amata ai ona aoga i le Dawson Primary School, sa faaauauina ana aoaoga i Samoa i le Malifa Primary School ina ua faamanuiaina ona matua mo le ulufale atu i le kolisi faafaifeau i Malua i le 1995 ma faasolo atu ai ina ulufale atu i le Leifiifi Intermediate School lea na amata ai ona alualu i luma lona tomai ma avea o se tama poto ma sili aoao ina ua tauaaoina atu ia te ia le faailoga o le Dux.

O le tausaga 1999 sa faauuina ai ona matua i Malua ma toe foi ai loa i Niu Sila, peitai o le tausaga 2000 na Malaga mai ai loa si o latou aiga i Sini Ausetalia ina ua valaaulia ona matua mo le galuega tala’i i Belmore ma aoga ai loa i le Fairvale High School NSW seia faaiuina ai lana vasega 12 (year 12) ma ulufale atu ai loa i le University of Western Sydney i le 2005 lea ua faaeaina ai lava lona taumafai ina ua

mae’a le lima tausaga o tausinio mo ona faailoga faaloia i le 2010. O Junior o le ulumatua o le fanau e toafa a Isaako ma Tavai Patea, o le uso ia Esau, ma ona tuafafine ia Sailuma ma Elisa Patea.

Fa’aalia e Rev. Isaako Patea le tama o Junior i le vaega o talafou a le Observer Samoa e faapea, e ta ua tele i matua Samoa ona una’i fanau i le sailiga o le poto ma le atamai ae faatuatuana’i le mativa ma le le tagolima aua e sili atu faamanuiaga e maua mo le lumanai nai lo le vave tuu le aoga ae saili le sosia ma le manuia i tulaga tau tupe.

O le aso Toonai 25 o Setema 2010 na taitaia ai le sauniga taualoa ma le loto faafetai e le susuga i le Toeaina Faatonu ia Peleti Toese Toailoa o le Matagaluega EFKS Niu Sa Uelese, sa tatalo faamanuia le Toeaina mai Samoa le susuga ia Faatauoloa Moa Pualele Mauala mai le EFKS a Falefa, sa auai i lenei sauniga mamalu le susuga i le Toeaina ia Taipo Malifa mai le Pulega a Sini Saute, sa auai mai ai foi le susuga ia Rev. Iose Patea, susuga ia Rev. Letaulau Poufa Pesalelei o le failautusi fesoasoani a le EFKS aoao i Samoa ma atunuu mamao  faatasi ai ma le toatele o faifeau ma le mamalu o Samoa sa patipatia le alofa tunoa o le Atua i le atalii ina ua tini pao le uto i lona faamoemoe.

I le faaiuga o le polokalame i le taumafataga ma faafiafiaga a le autalavou EFKS Villawood, sa matua Sasaa Faaoti ai le Utu a le Faimea i fa’aaloaloga maualuluga sa alo i ai aiga na lua o le susuga ia Rev. Isaako ma le faletua ia Tavai Patea, i ie tetele o le Malo ma le palapala malo faapea tupe paia ona o le agaga ua tumu i le loto faafetai ma le fiafia i taumafaiga manuia o mea nei o fanau.  

   

O le tofa ia Tuiloma Patea malaga mai Niu Sila sa fai ma fofoga o le aso ma na faaiuina i se tatalo faamanuia sa saunia lava e le Toeaina Faatonu ia Peleti Toailoa ma lulu aao ai loa ma faatofa i le faatasi mai o le Atua.

Asosi Lagimalofie a Samoa i Sini Ausetalia 2010

tusia: Toomata Polutele Maiava
 
Faatuina le asosi Lagimalofie a Samoa i Sini Ausetalia 2010.
 
O le aso Toonai 2 o Ianuari 2010 na oso a'e ai se faamoemoe fou o le lumanai manuia o alo ma fanau a Samoa i tupu ma tamalii, failauga, faletua ma tausi faapea le tupulaga talavou i tama ma teine o loo laeiina le tatau poo le malu a Samoa. Ina ia faatuina se asosi a le Lagimalofie a Samoa lava latou ia i Ausetalia aua le faamaopoopoina o le tu ma le aga i fanua a fanau lalovaoa a le atunuu o loo fia silafia le olaga faataule'ale'a a le sogaimiti ma le teine taupou i le fale o matai faapea foi le va fealoa'i i aiga, ekalesia ma soo se nofoaga faitele e iloa ai le Samoa aoaoina.
 
Ina ua fesiligia e le vaega o talafou le afioga ia Su'a Suluape Petelo o le faatama o le asosi mai le afioaga o Faleseela Lefaga ma o ia foi o se tufuga ta tatau sa fitaituga ma le galuega i Ausetalia i le tele o tausaga ua mavae seia oomai i le taimi nei e uiga i le faamoemoe na ia taua ai e faapea ai.
O le foi mai Samoa i nisi o faamoemoe sa faataunuuina ai i le faaiuga o le tausaga 2009 o lenei lava matafaioi o le asosi a le Lagimalofie na a'e ai sona lagona ina ia tatau foi ona mafai ona faia lenei auaunaga i Ausetalia ma o lea na ia taloina ai se fono i nisi o alo sa ia galueaina le taina o a latou malofie, ma na taliaina e le toatele o alo Samoa faatasi ai ma nisi sa taina a latou tatau i isi foi tufuga ta tatau o le atunuu.
Sa taliaina le fanoga ma o lea na amata ai loa i nisi lava o alo Samoa faatasi ai ma se alii papalagi Ausetalia ua uma ona ta lana pe'a e amata loa le asosi, sa saunoa foi Suluape e le'o faapito augafa le faamoemoe na o e sa tata ia te ia ae o loo tatala lava le avanoa i soo se tasi sa taina i nisi tufuga ta tatau.
Sa fesiligia foi e talafou le tofa ia Tuautu Tago Samaauga mai le afioaga Laulii ma Fasitoo-Tai o le taitaifono sa filifilia i lea aso Toonai 2 o Ianuari 2010 le auga autu o le asosi ae na ia taua, o le aga i fanua lava ina ia aoaoina i tupulaga lalovaoa o le atunuu ma ua faamoemoe o le aso 30 o Ianuari i lona aso Toonai o le'a amatalia ai le i se ava o le feiloaiga e faatinoina ai le tu ma le aganuu ona faagasolo lea i nisi o tautua a le taule'ale'a Samoa i le sogaimiti ma le teine taupou le malu i lana ia foi matafaioi i le fale o matai aemaise nisi o talatuu ma tala o le vavau o le'a mafai ona faasoa ai ma tufa atu mo le mamalu o le asosi.
O lenei vaega ina ia tumau ai pea i le loto ma le mafaufau o le tama ma le teine Samoa le taua o lona faasinomaga ma lona tupuaga o le Samoa moni, e ui lava e le o i ai se atoatoa o tupu ma tamalii faapea foi failauga i le aganuu ae faamoemoe lava i le tofa fetufaa'i ma le faautaga fefaasoa'i e manuia ai le asosi ma le faatauaina o le tu ma le aganuu a Samoa, o le fetalaiga mulimuli lea a le tofa ia Tuautu i le sui o talafou.
 
O nisi o le asosi sa mafai ona auai atu i lea aso Toonai o Afiafi Alai Futialo o Levi Saleimoa, John Ioane Laupepa o Faatoia ma Mulifanua, Max Schuster ma John Schuster o Faleapuna, Pio Aki Tauiliili o Safotulafai, Vasa Lauvao o Fagaloa, Samaauga Samaauga o Laulii, ma Michael Suluape o Faleseela Lefaga ma Malie faatasi ai ma le alii papali Ausetalia o James Ellison o sogaimiti ia, ae o malu o Fou Lauvao o Savaia Lefaga, Meri Tausaga o Laulii, Julian Samaauga Vailuutai ma Laulii ma le tamaitai Cook Island o Tamara Schuster.

 

Peitai e ui ina faafesootai atu le toatele o alo Samoa e fia auai i lenei asosi ae ona o avanoa ua le mafai ona paaau atu ai, ma le faamoemoe i le aso Toonai 30 o Ianuari 2010 o le a faatasia ai mo le amataga fou o lenei asosi i totonu o Ausetalia. I lenei lava avanoa ua mafai ona faalauiloa atu ai i nisi o alo Samoa i Ausetalia lava latou ia numera mo lenei asosi i le lumanai. Su'a Suluape ph: 02) 86785285, mob: 0451011917, Tuautu Samaaauga ph: 02) 46277846, mob: 0412077376.

Faaliga Mafutaga Tina EFKS Pulega Sini Saute NSW Ausetalia 2009

Tusia: Toomata Polutele Maiava
 
Maoa'e Faaliga Mafutaga Tina EFKS Pulega Sini Saute NSW Ausetalia 2009
 
O le susuga i le faifeau Toeaina ia Taipo Malifa o le Pulega a Sini Saute i le setete o Niu Sau Uelese a le Ekalesia Faapotopotoga Kerisiano Samoa i Ausetalia, sa ia tatalaina le amataga o le Mafutaga a Tina i se sauniga lotu puupuu i le aso Toonai 8 o Aokuso 2009. Na maea ona tulai lea o le faletua ia Ataataoletaeao Mareko le failautusi o le mafutaga e faafeiloai ma tatalaina aloaia le faamoemoe o tina i lea po i le YMCA hall i Greenarce. Ta ua e le failautusi o le mafutaga i le vaega o talafou le agaga moni ma le autu aemaise le auga o aute o lenei tuufaatasiga o Tina uma o le Pulega, ina ia tumau ma mausali ai pea le ola galulue ma felagolagomai i le galuega a le Atua i totonu o falesa taitasi.
O le polokalame faagasolo i le tulaga o faafiafiaga na tatalaina aloaia e Tina o le mafuta EFKS mai Bankstown i le faletua ia Faasuka Paulo ina ua ave i ai le faatomuaga o siva faaleAgaga ma siva faaSamoa lea na taitai mai e le tina ia Taumaave Seiuli Ainuu, sa sosoo mai ai ma le faletua ia Heather Keilani ma le mafutaga mai Liverpool i le taitaiga a le tina ia Daisy Tevao, o le faletua ia Tolopo Lemalu i le pese o le pipili ma le mafutaga mai Moorebank i lo latou taitai ia Seepa Tuifao, o le faletua ia Mala Semaia ma le mafutaga a Condell Park sa faaulufale mai e le tina ia Sa Pepe, ao Canterbury i le faletua ia Faaesea Leleimalefaga ma le mafutaga na taitai mai e le tina ia Leata Tovale.
O le faatafiti o itu e lua i le faaleAgaga ma siva faaSamoa sa feagai ma le mafutaga mai Camden i le faletua ia Ataataoletaeao Mareko ae taitai mai e le tina ia Tio Tupu Natapu, ae o le taualuga na matua fuli ai le tina ia Sopa Letoa Toafa mai Lalomanu Aleipata e toe faaiila lana taleni o le pese lea na amataina ai le latou faafiafiaga a le tamaitai lauiloa i ata tifaga o Sister Act i le gagana Samoa.
Sa molimauina e talafou le maoa'e o le tulaga ua oo i ai le tomai o tina i mea tau faafiafiaga i le itu i le tino ma le itu faaleAgaga e le gata i pesega a Michael Jackson e manatua ai lenei alii pese lauiloa i le lalolagi, ao sikaili fou i siva faaleaganuu. Ta ua e le afioga ia Laulu Galala i le sui o le Samoa Times e faapea o se tausaga sili atu lea talu ona faia ma faataunuuina lea ituaiga mafutaga a tina e tuufaatasia ai Tina uma o le Pulega mo le lumani manuia o Ekalesia.
Aua e talitonu a ia o le faamoemoe ola lea o soo se mea o Tina Samoa ma e le o lilo lava lo latou gagana faifaipea ma tala tuutaliga; "E au le Inailau a Tina"
O le siui o le faamoemoe sa saunoa ai Sitaua Malifa o le taitai o le Mafutaga a Tina o le Pulega e toe faafetaia ai mafutaga a tina uma mo le latou lagolagosua, ae o Faaesea Leleimalefaga o le teutupe sa tulai mo le tolaulauina o le seleni sa maua i le po, lea e lata atu i le $7,000 tala.
Sa fetalai le tausi o Teta Leafa Auelua e faafetaia ai Samoa potopoto i ona tulaga faalupeina faapea le susuga i le Toeaina ma le vasega o faifeau ma isi usoa ekalesia i lo latou maau ma le milomilosia ua maualuga ai lo latou faamoemoe.
Na saunoa faafetai le afioga i le tiakono ia Sala Amosa Vaifale mai Liverpool ma Samalaeulu Savaii e fai ma sui o Samoa e faamalo ma faafetaia le mafutaga a tina o le Pulega.
O le faifeau malolo mai Samoa le susuga ia Simalu Kovati o le faafeagaiga taulagi o le ekalesia EFKS i Taga Savaii sa fai ma sui o lona faletua ia Nefu e momoli le agaga faamalo ma tatalo faamanuia ai loa ma tatala ai le filialii i le manuia o le po fiafia a le Mafutaga a Tina EFKS i le Pulega Sini Saute.

Tatalaina le CD pese a Fetauimalemau Masinalupe

tusia: Toomata Polutele PMaiava
 
 
Tatalaina le CD pese a Fetauimalemau Masinalupe
Ua avea le Hall tele a le Maluapapa o le Talalelei a le Ekalesia Faapotopotoga Kerisiano Samoa i Fairfield, pei ona tausia e le Toeaina Faatonu o le Matagaluega a Niu Sa Uelese, Susuga ia Peleti Toese ma le faletua ia Senetenari Toailoa, ma sulufaiga o le atunuu i le sailiili matagi e ala i seleni ma tupe aua faamoemoe tauatia'e a Ekalesia; o faalapotopotoga tumaoti, ma nuu ma afioaga mai Samoa e mapu i ai i le faigata o le soifuaga ma le faaletonu o le tamaoaiga o loo i ai nei le lalolagi.
I le aso Toonai la na sei mavae atu sa molimauina ai e talafou le faatumulia o lea hall tele i le tatalaina o le CD pese a le teneitiiti talavou iva tausaga le matua, o Fetauimalemau Feagaimalii Keneti Aumoana Masinalupe lea na taitaia e le afioga le alii Sea o Alefoti Seloti Alainuuese o le ekalesia Metotisi i le Faa-Sinoti a Niu Sa Uelese; i le faafetai molia i le Atua soifua mo le malosi faafouina i le fanau e sailimalo ai i soo se mea lelei e atia'e ai aiga, nuu, ekalesia faapea malo .
Ina ua maea ona momoli lapalapa o malo i le alofa o le matai sili i le lagi, ona sagai ane lea o ai o le Tai i le lima mafola ma le aao foai o le atunuu i saasaaga faa-Samoa e pei ona vavae ai le foe i faaaliga ma pesega a lenei teneitiiti talavou ia Fetauimalemau, faatasi ai ma le lagolagosua a tamaitai pepese o Aagalelei ma Agalofa Soti o alo o le tausi Matagaluega ia Rev. Soti ma le faletua ia Uputaua Soti.
 
E le gata ina molimauina e le atunuu ma Samoa potopoto pesega suifefiloi a lenei teneitiiti, ae sa vaaia foi le lagolagosua a nisi o alo pepese talavou a Samoa, lea sa mafai ona auai atu ma faamatagofie ai le ula poo le faasolo su'i fefiloi i le aso ananafi. O i latou ia o le Tavu'i Sisters, alo o le tausi matagaluega ia Anesone ma Ofeira Tavui Leota; o le Lauina Sisters, alo o Seiuli Moni ma le faletua, Dora Poloai ma si ona uso, alo o le susuga ia Rev. Fiapoto Poloai ma le faletua o le ekalesia LMS Toefuataina, o le alii pese o Uili Tanuvasa, le Resmed Gospel Singers, o alo o le susuga ia Pastor Pama ma le faletua ia Lealofi Fuimaono, faatasi ai ma le Autalavou mai le EFKS a Bankstown, lea o loo tausia e le susuga ia Iele ma le faletua ia Faasuka Paulo, i so latou sao i le pese mo le aso Sa o Tina lea na sei mavae atu
O le sui o le Fofoga Moomia o Samoa sa fai ma fofoga o Iea aso tele i le tatalaina o le CD a Fetauimalemau Masinalupe, ma ina ua o taugaga ifo le fetu o le afiafi sa faamaeaina ai loa le faamoemoe ma tulai ai le susuga ia Salanoa e tolaulauina le alofa tulai o Samoa lea e lata atu i le $20,000 tala Ausetalia.
O le tofa ia Pula Lolua sa fai ma sui o aiga na lua o Fetauimalemau e faafetaia le aufaigaluega paia ma Samoa potopoto, aemaise faaaloaloga maualuluga i le ie o le malo faapea ona teuga eseese.
Ina ua saili se gafa o le fale ma na tasi ai le faatau paia a Samoa ia Tupuola Viliamu Eli le failautusi o le ekalesia i Fairfield, e tali fuaitau i le fula ma le mamala aemaise o faaaloaloga faatamalii sa faatinoina i le hall a le Maluapapa. O le susuga i le tausi matagaluega ia Laau Aumua sa tatalo faamanuia ma tatala ai loa le filialii i lea aso Toonai.
 
O Fetauimalemau e iva tausaga le matua ma o ona matua o Feagaimalii Fiu Keneti Aumoana Masinalupe o Matautu Lefaga, Sasina ma Utualii, ao lona tina o Ruta mai le afioaga o Asau, ma o le susuga lava ia Keneti le tuaa o Fetauimalemau sa ia tusia pese e sefulu ma fatuina ia o loo i totonu o lea CD, 1-Olaga soona fai, 2-E lafilafi fua Atamu, 3-Vii o Fetauimalemau Mataafa, 4-Vii leitio Fofoga Moomia o Samoa, 5-Tina silisili ona lelei, 6-Vii o Salesa Sega, 7-Oi fea le Talalelei Samoa, 8-Vii Asau, 9-Tina a'oa'o mai ita ma le #10-Vii o Lefaga.
Saunoa le faauluuluga o le fale puepese Samoa o le Resmed Recording Studio i Ausetalia susuga ia Pastor Fuimaono Pama Veletaloola ma le faletua ia Lealofi i le vaega o talafou e faapea, e faafetaia ai le faatasi mai o le Atua ona o le galuega sa feagai ma le pueina ma tuufaatasia taumafaiga a lenei teneitiiti talavou, aua e talitonu a ia; a amata ma tapue laiti olaga o le fanau e nai o latou matua i soo se taleni o le a le taumate le manuia mo aso oi luma i soo se itu. Faamoemoe o l evaiaso fou o le a tufatufaina atu ai i faleoloa i Niu Sila ma Samoa faapea soo se itu o le kelope o loo aumau ma nopiai ai o tatou tagata. 

Osia le Feagaiga Rev. Iele & Faasuka Paulo ma le EFKS Bankstown Ausetalia 17Apr2009

tusia: Toomata Polutele PMaiava
 
Osia le Feagaiga Rev. Iele & Faasuka Paulo ma le EFKS Bankstown NSW Ausetalia

 

O le aso Faraile 17 o Aperila 2009 sa osia ai le feagaiga a le Ekalesia Faapotopotoga Kerisiano Samoa a Bankstown i le setete a Niu Sa Uelese, Ausetalia ma le susuga i le aoao faauuina mai Malua ia Iele ma le faletua ia Faasuka Paulo. Sa taitaia lenei sauniga mamalu e le susuga i le Toeaina o le Pulega Sini Saute, Rev. Taipo Malifa. O le susuga ia Rev. Namuasua Mareko sa lauga mo le Ekalesia ae faaiu i le lauga matagofie ma le faamalosi au mo le faifeau ma lona faletua, sa saunia e le susuga ia Rev. Malua Keilani o le faafeagaiga o le EFKS a Liverpool mai le afioaga o Iva ma Faatoia.

O le failautusi o le ekalesia ia Itele Tupai Fanene mai le afioaga o Lalomalava sa tulai mo le tala o le galuega ma tolaulauina ai matafale ma aiga galulue lea e sefulu ma le ono ua amatalia ai le galuega tausinuu a le faifeau ma lona faletua, o le teutupe o le susuga ia Opi Toomalatai ma o viiga o le Atua sa saunia lava e le aufaipese siufofoga malie mai Bankstown i le ta okeni o Semeatu Maiava 13 tausaga, Byron Laufili 20 tausaga ma le faiaoga ia Iputau Malo A'aitui mai le afioaga o Saanapu.

Sa faaiuina lea sauniga taualoa i le Sakarameta o le faamanatuga na taitaia lava e le susuga i le Toeaina ia Taipo Malifa, na maea le sauniga ona faagasolo loa lea o le polokalame e ala i le taumafataga ma faaaloaloga masani i mea nei o osiga feagaiga a le EFKS. O le tofa ia Lemaota Aigamaua Maiava mai Utualii ma Tafua poo le susuga i le aoao fesoasoani o le ekalesia sa fai ma fofoga o le aso i le malo toga ma faafetaia susuga i Toeaina mo le sauniga paia sa feagai ai, e le gata i lea ae sa ia momolia foi le ie o le malo e osi ai le feagaiga a le EFKS Bankstown ma lo latou faafeagaiga. Sa tali fuaitau le tofa ia Fiu Faaofo mai le afioaga o Sili Savaii e atue ai le faga i laua i ie o le malo sa tatalaina ona o faaaloaloga maualuluga mo le aufaigaluega ma Samoa potopoto.




Sa faaiu i toe saunoaga o le aso pei ona saunoa i ai le Toeaina faatonu o le Matagaluega a Niu Sa Uelese, Peleti Toese Toailoa e faapea; "O Bankstown o se vavae sa mumu itiiti toetoe-a a mate, ao lele ua toe susulu malosi mai lona mumu e ala i le feagaiga ua osia i luma o le Atua ma Samoa atoa, lea na faatino ai le ie o le Malo e faamausali ai le tumau o le ekalesia ma lo latou faifeau le susuga ia Iele Paulo mai le afioaga o Lalomalava Savaii, ma le faletua ia Faasuka mai le afioaga o Lepa i le atu Aleipata.O le susuga ia Iele Paulo o ona matua o Paulo ma Tevaga Sili'u le tina mai Lalomalava, ao Faasuka o se alo faasino ia Auelua ma le tina ia Taputu o Lepa

I lea lava saunoaga a le susuga i le Toeaina Faatonu ia Peleti Toailoa na ia tala ai le gafa o Bankstown mai le 1983 na faatuina ai le lotu lona lua o le EFKS i Canterbury ae tausia e le susuga ia Keti Magalo o Toamua ma le faletua ia Moevanu o Moataa sa amataina lea galuega ma faaigoa ai ia Canterbury. O le uluai lotu o le EFKS o Balmain ma sa tausia e le susuga ia Tepa ma May Faletoese ma oi laua foi o Fetu pupula o le galuega i lona tau amataina ma toto le fatu o le EFKS i Ausetalia.

O le susuga i le alii Aoao Fesoasoani ia Aigamaua Iosefa Maiava sa taulamua i le amataina o le lotu ma nisi tagata i na tausaga faatoa amata ona autovaa mai Samoa i Sini Ausetalia i le 1980.

Sa toe siitia le lotu ma maua le nofoaga i Marrickville e fai ai sauniga ma sa solo lelei le galuega seia oo ina taliaina le Matagaluega a Ausetalia i le Fono Tele i Malua i le 1985. Peitai o le taimi o le solo lelei ma le taimi o le faigata, ina ua ulua'i malaga Keti Magalo ma le faletua ia Moevanu ma nisi o faifeau i le Fono Tele i lena tausaga, sa tuai ai ona toe taliu mai le usugafono a le susuga ia Magalo ma lona faletua ona o nisi o mafuaaga le maalofia faale-aiga.

Ma o le auala lea ua taofi eseese ai Tutuila ma Ape i totonu o le ekalesia ma vaeluaina ai loa, o e finagalo pea ia Keti ma Moevanu o i ai, ao e e finagalo mo se isi faifeau fou nonofo ai pea i le Ekalesia i Marrickville ma o lea sa valaaulia ai loa Rev. Fosi ma Latai Palaamo e avea ma matua faaleagaga o le lotu i Marrickville.

Sa toe tau amata le galuega ma toe fai le lotu i le fale o Keti Magalo i Ashbury e susuga i A'oa'o Fesoasoaani e toalua o Aigamaua & Ofeira Maiava, Taumai & Ula Letufuga faatasi ai ma nai toeaiina o Fagalima & Atapo, o Sene, o Peti, Papaletoa Isaia & Pelenise, Ioelu & Osiana i na vaitaimi o le toa gaogao o le galuega faatasi ai ma isi ma o latou auaiga e faatalitali ai le toe foi mai o le usugafono a le susuga i le Toeaina ia Keti Magalo ma lona faletua.

Ua toe foi mai Keti Magalo ma Moevanu ina ua tuanai nai masina ma toe sii ai loa le lotu i Bexley, uma Bexley Arncliffe-Coronation Hall, ma sui ai loa ma le igoa ia Sydney pei ona i ai nei seia oo ina faaeaina Keti Magalo e avea ma Toeaina o le Matagaluega a Niu Sa Uelese atoa, sa toe siitia atu i Kingsgrove i le falesa i Moorefields rd ma iu lava soifua galulue o ia Toa o le Talalelei ma faasolo ai lava ina salalau atu le ekalesia EFKS i isi setete"

 Rev. Iele & Faasuka Paulo / Rev. Palemia Tauiliili & Tovale: EFKS Samalaeulu Savaii

O le lotu i Marrickville sa aami ai le faifeau fou ma malaga mai ai loa Rev. Fosi Palaamo ma le faletua ia Latai ina ua maea le la galuega i Vailoa Faleata sa galulue ai ma avea ma faafeagaiga seia oo ina toe sii atu le lotu i Carlton, mai Carlton siitia atu i Bankstown i lalo lava o le taitaiga a le susuga ia Rev. Fosi Palaamo ma o iina lava na faaeaina ai  i le tofi Toeaina seia oo ina maea lana auaunaga i le tausaga 2007.

O Oketopa na toe atia'e ai le galuega ma tofia ai e le susuga i le Toeaina fou o le Pulega ia Taipo Malifa le susuga ia Iele ma Faasuka Paulo ina ua fauuina mai le Kolisi Faafaifeau i Malua e galulue faamisionare mo le tausiaina o le lotu seia oo ina osia le feagaiga i le aso Faraile 17 o Aperila 2009.

I tala faamaumau ma tusitusiga a le vaega o talafou e faapea o i latou lava sa tuufatasia mo le toe faamumuina o le vavae sa mu itiiti, e sefulu ono matafale ma aiga galulue lea e aofia ai i totonu ma poutu toa o le galuega na amataina maia le Gafa o Bankstown i le 1983 e oomai i le 2009, pe'a fua i le tala faasolopito na fofogaina e le susuga i le Toeaina ia Toailoa

Na maea le faamoemoe na malaga mai ai aiga na lua ma toe taliu atu ai i Samoa le susuga ia Rev. Palemia ma le faletua ia Tovale Tauiliili, o le faafeagiga taulagi o le Ekalesia Faapotopotoga Kerisiano Samoa i le afioaga o Samalaeulu i Savaii, faatasi ai ma le susuga i le Toeaina ia Lui Tupa'i mai le ekalesia LMS Toefuataina i Blockhouse Bay i Niu Sila.

Faatasi ai ma nisi o aiga e pei o le tofa ia Lefaoseu Malaeafoa Auelua mai Uelegitone, le tofa ia Tupai Ete ma Tevaga Sili'u  mai Niu Sila ma Malu Talisau Tevaga mai Samoa.

Taua e i latou ia i le vaega o talafou, o le tatalo ma le tapuaiga a aiga nalua ina ia tupu ma ola le fatu ua toto i Bankstown e lupe faalele ma taulaga tagata o aiga ia, aua le faatupu laia pea o agaga mo le Atua ma lona malo.

I le masina o Iuni ua toe fesiita'i ai nisi o tofiga a le ekalesia ma see atu ai le tiakono ia Toomata Polutele o Avao ma Utualii e fai ma failautusi, o Opi Toomalati o Matautu i Apia o le teutupe, o Auve'a Taoai ua see atu i le komiti o le Atinae, ao Uluao Tuaoimalii Maiava o Utualii ma Safa'i Savaii i le komiti o le Alofa. O le susuga i le Aoao Fesoasoani ia Lemaota Aigamaua Iosefa o Utualii ma Tafua ua see atu i le komiti o Taulaga.

I le aufaipese ua tofia Auvea Taulolo Notoa Taoai o Sapapalii e fai ma taitai pese, failautusi Taofia Toomalatai o Vailoa Faleata ae teutupe Ofeira Maiava o Malie. Taitai o le au asafo i le ta okeni ua tofia le tofa ia Iputau Malo A'aitui mai Saanapu ma le ta okeni talavou le tamaitai 13 tausaga o Semeatu Easter Maiava o Utualii ma Faatoia.

O nisi o tala fiafia i le fonotaga a le komiti o le au toeaiina ua maea atu na faailoa mai ai e le toeaina faatonu ia Peleti Toailoa i le vaega o talafou le pasiaina o le mataupu a le ekalesia a Bankstown na tuuina atu mo le faauuina o lo latou faafeagaiga e avea ma faifeau faauuina o le tausaga 2010 i le Fonotele i Malua pe a aulia atu i ai se ola ma se malosi. Ma o nisi ia o galuega ma atina'e fai a le ekalesia o loo faagasolo nei mo le faamumu teleina pea o le vavae sa mu itiiti ina ia avea o se lamepa mutele ma suluia ai itu uma o le lalolagi aemaise ia tele ni agaga mo le Atua ma lona malo e faavavau, faavavau lava Amene.



Fenunuti Numiamalii, Laloava Pelo ma nisi o sui o le ekalesia ma le faifeau e faamavae atu mo le usugafono i Malua 2009 


 

webmaster tpmaiava, email: mail@fofogamoomiasamoalive.com

 

Osi feagaiga EFKS Riverstone ma Rev. Nuuausala & Mutaaga Cowley

Osi feagaiga EFKS Riverstone ma Rev. Nuuausala & Mutaaga Cowley
 
O le aso Toonai 26 o Aperila na osia ai le feagaiga a le alii faifeau ia Rev. Nuuausala Harry Fualaau Cowley ma lona faletua ia Mutaaga faapea le Ekalesia Faapotopotoga Kerisiano Samoa i Riverstone i le itu i Sini Sisifo o le Matagaluega a Niu Sa Uelese (NSW). O le susuga lava ia Simeona Taefu o le faifeau Toeaina o le Pulega a Sini Sisifo sa ia taitaia lea sauniga taualoa ma sa matua faatumulia i le mamalu o Samoa potopoto ma le ekalesia aoao i ona tulaga maualuluga lo latou le molimauina o lea faamoemoe faapea aiga o le faifeau ma lona faletua malaga mai Samoa ma Niu Sila.
O le susuga ia Rev. Nuuausala o se lupe faalele o le afioaga o Vaigaga ma na mafai ona auai mai ai si ona tina ia Toi Malagaalii Avei Cowley mai Niu Sila faatasi ai ma Sua Faasao ma Faataualofa Tuilaepa mai Aotearoa lava ma le toatele o le latou aiga. O le faletua o le faifeau o Mutaaga Cowley e mai le afioaga o Lotofaga Aleipata ma na mafai foi ona auai ai nisi o lona aiga e molimauina le faamoemoe pei o Siliga Manaia ma Mauga.
E tele ni timaiga ma apoapoaiga faale-Atua sa utupupuina ai le faifeau ma lona faletua i le alo atu i le galuega talai sa saunoa ma malele i ai le aufaigaluega a le Atua aemaise le faalaei au a le Toeaina Faatonu o le Pulega a Niu Sa Uelese le susug ia Peleti Toese Toailoa, i le faaiuga o lea aso taupoina sa fetalai ai le tofa ia Alipia Alipia e fai ma fofoga taumolimoli o le faifeau ma lona faletua faapea le ekalesia i Riverstone ona o le galuega folafola sa faaoloaina ai le latou galuega fou ao alo atu mo le faaauauina pea o le soifua tapuai ma le ola tauivi i le Atua ma lona finagalo.   
E ova atu ma le sefulu matafafale o le aulotu ae tusa ma le lata atu i le 60 tagata lolotu o le ekalesia ma na faaalia e le susuga ia Rev. Nuuausala i le sui o talafou lona agaga faafetai i le Atua ona o le faaaogaina pea o la soifua e faalauteleina ai pea ma talai lona finagalo, o le susuga i le alii faifeau ma lona faletua o ni uluai tiakono i le ekalesia EFKS i lona tau amataina o le lotu i totonu o le aai o Sini i le nuu o Balmain i lalo o le taitaiga a le susuga ia Rev. Tepa Faletoese ua tuumalo ma le faletua ia May lea ua faalautele atu ma tupu talaulau ma lauusisui ai le ekalesia i Ausetalia atoa.
O le failautusi o le ekalesia o Ape Palmer, teutupe o Viliamu Palaamo, i nisi o tofiga i le aufaipese o le taitai o Leefu Pula ma le faiaoga poo le faipese o Alipia Alipia
O le tofa ia Matua o le tiakono mai le ekalesia EFKS a Mt. Druitt sa tasi i ai le faafitiga a agalega mo le faatau paia e molimoli se faafetai ma le faamalo i le ekalesia i Riverstone on o faaaloaloga maualuluga ma le faatamalii lea sa faatinoina mo le aufaigaluega paia a le Atua ma Samoa potopoto i le fula ma le mamala faapea le toga paia na tatala ona o le tagai i le auauna a le Atua ua avea ma o latou matua faaleagaga.
Sa faaiuina i se tatalo faamanuia na saunia e le toeaina ia Simeona Taefu ma tatala ai loa le filialii.
 
tusia: Toomata Polutele Maiava Leota

Faamanatu e Ausetalia le 178 Tausaga o le Talalelei i Samoa

by: Toomata PMaiava

O le aso Sa na sei mavae atu nei sa faamanatuina ai e le Ekalesia Faapotopotoga Kerisiano Samoa le 178 tausaga talu ona taunuu le Talalelei i laufanua o Samoa i Mataniu Feagai ma le Ata i le afioaga o Sapapalii, ina ua talia e Malietoa Vainuupo misionare ma le talaiga i le faaolataga ia Iesu Keriso; ma faapena ona faasopolia ai le atunuu ma suluia ai i le malamalama e toilalo ai tu ma aga faanuupo. Peitai e ui ina motu ma le taula le toatele o tagatanuu o Samoa i le aumau i atunuu ese pei o Niu Sila, Ausetalia, Amerika ma isi vaega o le lalolagi, ae sa le mafai ai lava ona faagaloina le agaga faafetai e sulaina ai le agalelei o le Atua ma lana puipuiga malu i si o tatou atunuu. 

O le susuga ia Rev. Fiti Fiu Semaia o le faafeagaiga taulagi a le Ekalesia EFKS i Condell Park pei ona la tausia ma le faletua ia Mara, sa ia taitaiina se sauniga lotu taualoa i luga o le tautua a le leitio Fofoga Moomia i le taeao segisegi o le aso Sa na sei mavae atu nei, e atu-e ai le alofa matalasi o le Tapaau sili i le lagi ona ua aulia ma le manuia e Samoa lenei aso taua i ona tala faasolopito i le taunuu atu o le lotu i ona laufanua.

E le gata o se aso Sa taua i le Ekalesia Samoa na faautu i ai le sauniga lotu, ae sa saunoa foi le faafeagaiga i le sao o Tama i lo latou aso Sa lea sa faatauaina e Ausetalia ma isi atunuu o le lalolagi (Fathers Day) le faafetaia o le itupa o Tama i le latou galuega mae'ae'a o le tausia ma fa'afaileleina o le lumanai manuia o aiga, nuu, malo aemaise Ekalesia.
I lea lava aso Sa ina ua maea le fa'asalalauga tu'usao a le leitio Fofoga Moomia na logo ai itu e 4 o Ausetalia ma le lalolagi atoa i luga o le internet, sa alo ai loa le Ekalesia Faapotopotoga Kerisiano Samoa i ona matagaluega e tolu i Ausetalia mo lotu aofai o le Talalelei e aoina ai le taulaga mo nuu ese, faatasi ai ma taulaga pese poo viiga i le Atua.
I le setete lenei o Niu Sa Uelese e tolu ona Pulega ma o loo tausia lava ma vaaia e le Toeaina faatonu o le Matagaluega ia Peleti Toese Toailoa ma le faletua ia Senetenari mai le Pulega a Sini Matu, o le Pulega a Sini Saute o loo tausia e le susuga i le Toeaina ia Taipo Malifa ma le faletua ia Sitaua, ao le Pulega a Sini Sisifo o loo tausia e le susuga i le Toeaina ia Simeona Taefu ma le faletua ia Alofa.
E tusa ai ma Ie faamaumauga a le vaega o talafou talu ona taunuu mai le lotu Ekalesia Faapotopotoga Kerisiano Samoa i laufanua o Ausetalia i le aai lenei o Sini i le tausaga e 1980, ua faamauina le oo atu i le luasefulu falesa poo aulotu, e ese mai ai i isi setete o le malo tele.

Saunoa se tasi o tama matua le tofa ia Tiata Umuti Tiata o se ua leva ona seei i le tofi o le Tiakono Toeaina o le Matagaluega NSW faapea foi Alaimoana Afoa-Campbelltown o le Aoao Fesoasoani, Rev. Malua Keilani-Liverpool ma Faalafi Fonomalii tiakono a Campbelltown i le sui o talafou e molimau ai le vaaia pea ma le olaola o le galuega talai i Ausetalia, pei o la le tusi ia outou o atu ma fai outou ma soo i nuu ese i le Talaiina o le Talalelei ia Keriso ma lana faaolataga.

Rev. Leiite Setefano NZ & Rev. Otele Perelini Samoa auai i toe sauniga o Norman Palaamo

by Toomata P. Maiava
 
Rev. Leiite Setefano NZ & Rev. Otele Perelini Samoa auai i toe sauniga o Norman Palaamo
 
Ua toe taliu atu nei i Niu Sila le susuga i le toeaina o le ekalesia PIPC ia Setefano Leiite Setefano ma le faletua ia Lealofi mai Glen Innes ina ua maea le maliu o le alii o Norman Palaamo lea sa malaga mai ai i le aai o Sini. I se feiloaiga a le sui o le Samoa Times ma le susuga i le toeaina na ia faaalioa mai ai le agaga fiafia tele i le auaunaga ma le tautua a le nusipepa iloga lenei ua mafai ai ona faasopolia setete uma o Ausetalia le oo atu i ai ma ua mafai ai foi ona silafia mai ai e Samoa i Aotearoa mea o loo tutupu i lenei itulagi.
 
E le gata ina toe taliu atu le susuga i le toeaina ia Setefano ma le faletua ia Lealofi ae na faapena foi ona toe foi atu ai ma le pule o le kolisi faafaifeau i Malua a le Ekalesia Faapotopotoga Kerisiano Samoa lea sa malaga mai i le aai o Sini ina ia auai i toe taimi o le alii o Norman Otele Palaamo, faaalia e Setefano lona malaga mamao mai Niu Sila ma le faletua ona o le fia faamafanafana i le la uo mamae i le Talalelei le susuga ia Palaamo ma lona faletua ma e le mafai ai lava ona faagaloina Afi'a i si ona vao i vaitaimi o le galuega Talai i Niu Sila.
O le alii ua maliu ia Norman o se alo faasino i le susuga ia Rev. Fosi Palaamo ma le faletua ia Latai ua maliu, ma e aamia e le Atua lea atalii o loo tausia faatasi e Fosi ma lona faletua ia Bessie, faapea le tamaitai o Salamaina, Rowena seia o'o ina aamia e le Atua i le aso 11 o Fepuari 2008, e 27 ona tausaga, ma na fanau Norman ia Fepuari 25 o le 1981.
Sa mafai foi ona auai mai ai le susuga i le aoao ia Alesana Palaamo mai le atu Europa ma le faletua ia Lemau faapea foi le alii o Junior Fosi Palaamo lea foi sa avea ma sui o le Manu Samoa i tausaga ua alu mai Aealani (Ireland). Sa faatasi mai ai foi le afioga ia Fonoti Afamasaga Perelini mai Samoa ma toatele o i latou o loo alaala ma papa aao i setete eseese o Ausetalia nei.
E le gata i uso ma aiaga o Norman na malaga mai le atu Europa ae sa auai ai foi ma le tele o ona aiga mai Niu Sila ma Samoa ona o le fia auai i ona toe taimi. E pei ona silafia e lo tatou atunuu o le alo lenei o le toeaina ia Fosi ma le tina ia Bessie o se atalii e ma'i mai lona olaga atoa i lona fanau mai ma e tele ina iloa e Samoa i Ausetalia nei ona e auai lava ia i le tele o sauniga tetele ma le taualoa a lo tatou atunuu, sa taua e Palaamo i le sui o talafou le faafetaia o le alofa o le Atua ona o ia tausaga e tele na foai i le atalii ua umi ai le latou mafutaga.
Sa maua foi le avanoa e faatasi atu ai le peresetene o le Fono Aoao a Tagata Samoa i Sini le tofa ia Taumualasi ma le faletua ia Ane, faapea foi ona auai le susuga i le Toeaina Faatonu o le Matagaluega NSW Rev.Peleti Toese Toailoa ma le faletua ia Senetenari, faapea foi le Toeaina o le pulega Sini Saute Rev. Taipo ma le faletua ia Sitaua, ae le gata i lea o Rev. Itione Faavae-Eli ma le faletua ia Pefia mai le Ekalesia PIC Tutoatasi i Minto, o Rev. Kolia ma le faletua ia Sootuli Kolia ma le susuga ia Litala & Levei Tuimaualuga. Na auai foi le tina matua ia May Faletoese o se tasi o uluai tina o le galuega talai a le EFKS i lona amataga i Ausetalia i le 1980s.
 
Sa faaiuina le sauniga ma le peau faamavae a le alii o Norman Otele Palaamo i le hall o le kalapu lakapi iuni a Randwick ma tatala ai loa le filialii.

Tusi mai ia Alesana Palaamo - 25 February 2008

Faaalia e nisi o tama fanau a Samoa i atunuu mamao lo latou agaga fiafia e sapasapaia le tautua a le Fofoga Moomia mai Sini Ausetalia ma le SBC Radio 1 i Samoa i luga o le Upega Tafailagi lea e tuusao atu ai faasalalauga i luga o le URL i le Windows Media Player.
 
Tusi mai ia Alesana Palaamo - 25 February 2008 
 
 
Malo lava le soifua Toomata, faafetai fo'i mo faamanuiaga e pei ona tuuina mai ile ea.
 
E manino manaia le lua polokalame mai le ea, e pei ona ou faalogologo atu ile URL ile Windows Media Player, mai le internet. E leai se faaletonu i le faasalalau mai inei i le Netherlands, e leai fo'i se delay i le tuusao mai lea i luga o le ea (broadcast) o loo sau ai.
O le taimi o loo faasalalau mai ai le lua polokalame, e tusa lea ma le Aso Toonai ile 8pm i le po a iinei, a o le 6am ile Aso Sa a outou i Sini, ao 8am ile taeao o le Aso Toonai i Samoa.
 
Mo le lua silafia, e toatele lava tama fanau o Samoa o loo iinei i Europa, o Sweden, o Belgium, o Siamani, o Falani, i Egelani ile UK, i Ireland ma iinei fo'i ile Netherlands.
E to'afa tama Samoa o lo'o faigaluega ile malo iinei i le Netherlands, ile laumua o galuega e faatatau ile va o malo iinei e igoa - the Hague - ma ua matou fesoota'i fo'i.
O alii leoleo mai Upolu, o loo fai a latou assignment i Europa, e base mai iinei ile Netherlands, ae masani ona faimalaga atu i Bosnia, Russia ma nuu faapena.
O le lona lua nei o latou tausaga iinei ile Netherlands, o nisi ua fa'atasi mai o latou aiga ma fanau, ma ua mautu fo'i o latou aiga iinei, ua aoaoga foi tamaiti i aoga a le au Dutch.
E faigaluega uma ile lala o le United Nations (UN) ma ua manaia lava o matou talatalanoaga fo'i i email faapea le telefoni.
Ae ou te le o mautinoa poo faalogologo mai fo'i i le lua polokalame. O tama taaalo o loo tele ile UK ma Ireland, toatele lava le au uso ua mautu o o latou aiga iinei - E pei o Ali Lauitiiti, David Solomona, Alesana / Aneterea / Fereti Tuilagi, Maurice Faasavalu, Lome Faatau, George Harder, Tanner Vili, ma le anoanoa'i o tama Samoa iinei ile UK.
 
A e faafetai tele mo le fesootai mai. O la'u mobile iinei ole +31 619 155 899, ae mafai fo'i ona ou valaau atu mai se tasi o polokalame o loo ou faaaogaina ile internet, e free ma manino fo'i la'u valaau atu, pe a e finagalo iai.
 
Ia manuia tele galuega foi o lenei vaiaso, ae maise fo'i le lua tautua mo tagata Samoa, e le gata i Ausetalia ma Samoa, ae maise Samoa uma o loo mau ma nonofo i soo itu o lenei lalolagi.
 
Soifua ia
Alesana

Asiasi Taavaomalii Petelo i Ausetalia 2007-2008

by: Toomata Pasefika Maiava
 
Asiasi Taavaomalii Petelo i Ausetalia 2007-2008
 
O le maea ai o le faamanatuina o le aso Kerisimasi ia Tesema 25 o le tausaga 2007, na toai taunuu mai ai le alii fai faleaitu lauiloa a Samoa le tofa ia Taavaomalii Petelo i laufanua o Sini i sana malaga taamilo i Ausetalia mo ni ana faafiafiaga e faia i setete tolu o Sini Niu Sa Uelese, Perisipeni Kuiniselani ma Melepone Vitoria.
Taua e Petelo i se faatalatalanoaga ma le sui o talafou a le Samoa Times i luga o le leitio a le Fofoga Moomia i le taeao o le aso Sa le auga tonu ma le pogai o le malaga mai i Ausetalia i le faaiuga o le 2007 ma le amataga o le 2008 i le vevesi o tafaoga o ia aso faailogaina ae na taua e Taavao, lona malaga mai e i ai le faamoemoe ma le autu tonu na ia afea ai le malo tele o Ausetalia. 
O lenei faamoemoe o le fia ta'u mai lea i tagata                                                                           
Samoa i Ausetalia le tala ua pa ma salalau ma logo ai itu e fa i Longbeach i Amerika i le mea o loo nofo ma aumau ai e faapea ua oti, na matua le fiafia le alii faifaleaitu i sana saunoaga na faafofoga i ai Samoa ao faatalatalanoaina e le sui o le Samoa Times ona o nei uaealesi mosooi ua faamanogi leaga ai le faalogo a si toeaina.
Taua e Petelo o iinei lava i Ausetalia i o tatou tagata na salalau atu ai lenei tala leaga ma le anoano le faaoti o si toeaina ae o loo mautapuaaoina pea i le tausiga a leAtua soifua, faaalia e Taavaomalii o le 64 ai lenei o tausaga o lona soifua ae o loo ia lagonaina lava le mafanafana o le faatasi mai o le Atua ma lana tausiga ia te ia.
Ae na pau le mea o loo ia fia mauaina o le tagata Samoa i Ausetalia lea na faia lenei faamatalaga sei maua mai ona susue lea i luga o laugutu mafiafia ae sasa kainifo i le salutuaniu, e ui i le toatamai o Telo i lenei mea ae sa ia toe faamagalo i lenei ula leaga na ia faatupuina le tala i si toeaina. E fa la ni faafiafiaga ua sauni atu nei i ai le faifaleaitu ia Telo e faia e lua Sini, tasi Kuiniselani ma le tasi i Melepone ona toe foi ai lea ma si ona toalua pe a faataunuuina ia faamoemoega i le faafiafiaina o Samoa i Ausetalia.
E le gata ina malaga mai Taavaomalii i lenei faafitauli ae sa ia tatalaina foi le Liki Kirikiti a le faalapotopotoga a le Lau Samoa i le vaiaso na sei mavae atu nei.

EFKS Youth Fairfield Heal The World (Faamalolo le Lalolagi)

by: Toomata Pasefika Maiava
 
EFKS Youth Fairfield "Heal The World" (Faamalolo le Lalolagi)
 
O le Heal The World poo le Faamaloloina o le Lalolagi o le auga o aute ma le autu lea sa faatumutumu ma taulai i ai le faaevagelia a le Autalavou EFKS a Fairfield lea o loo tausia e le susuga i le Toeaina faatonu o le matagaluega a Niu Sa Uelese (NSW) i Ausetalia, Rev. Elder Peleti Toese Toailoa ma le faletua ia Senetenari Toailoa. I se polokalame faapitoa sa faatinoina i le tau faaiuga o le tausaga 2007 i le vaitau vevesi i le agai atu i le faamanatuina o le Kerisimasi ma faatalitali i le toai taunuu mai o le Tausaga Fou lenei 2008.
O le hall lava a le ekalesia o le Maluapapa o le Talalelei i Fairfield sa faataunuuina ai lea faamoemoe tele a le autalavou, ma sa mafai ona auai atu i ai nisi o autalavou e mafuta faatasi ma fefaasoaai i manatu ma lagona aemaise le itu faaleagaga ina ia tapasaina ai pea le tupulaga lalovaoa a le ekalesia ma Samoa i le olaga faakerisiano ma pipii pea i le Alii le amataga o mea lelei uma. O le susuga lava i le toeaina faatonu ia Peleti sa tatalaina aloaia i se upu tomua ona sosoo lea ma le faitauina o le Tusi Paia e Velita Lele i le gagana Samoa ao le susuga ia Lee Roy Saipaia sa faitauina le gagana faaperetania. O le tatalo na saunia e Misipati Lele i le gagana Samoa ao Keisha Gipson i le faaigilisi, na maea ona faagasolo loa lea o pesepesega ma siva faaleagaga e sulaina ai le alofa silisiliese o le Atua ona o lana tausiga matalasi ia Samoa ma le au kerisiano faatuatua. I nisi o autalavou sa auai i lea po o Villawood pei ona tausia e Rev. Isaako ma Tavai Pate, Granville o loo tausia e Rev. Siaki & Gaufa Brown, autlavou Crossroads o Penrith o loo tausia e Rev. Gafoa Faitua ma le faletua faapea Doonside o loo tausia e Rev. Iosefa & Satui faatasi ai ma le Team a tamaiti Samoa ua faaigoaina o le Lemy Saints lea na matua mataina le latou faatinoina o le faaevagelia i soo se itu faaSamoa ma le faapapalagi.
O se tasi o vaega taua na vaaia e le sui o le Samoa Times i lea po ona o ni tautinoga sa molimau ai nisi vaega o le fanau i le suiga o le olaga soona fai sa i ai i le toe foi ma manatua le alofa tunoa o le Atua soifua, e ala i le auaunaga i le autalavou ma atinae le ekalesia pele a le Atua, na auai i lea faatasiga tele a le autalavou a Fairfield se tasi o fanau a le ekalesia Samoa o loo sikolasipi mai le susuga ia Peletisara Lima.
Sa faaiu i le i le pese o loo faaautu ai lea faatasiga ma le faaaliga tele ua faaigoaina "Heal The World" ma tatalo faaiu ai loa le susuga i le toeaina faatonu Peleti Toailoa ma tatala ai loa le filialii i lea po

Tuumalo Tauiliili Seiuli Faamoana (53yrs)

 
 
 
 
 
 
 
FAAALIGA I LE MALIU TAUILIILI SEIULI ANERU FAAMOANA
 

E! FAANOANOA LAVA! E FAASILASILA ATU

LE MALIU O LE MATOU ATALII PELE, LE USO, LE TAMA, O SE UO, O SE AUAUNA FOI A LE ATUA I LE TOFI O LE AOAO FESOASOANI, AEMAISE O IA FO’I O SE AUAUNA SA VAE MA LIMA I AI SAMOA I LANA AUAUNAGA, I LE SIUFOFOGA POO LE LEITIO FAASALALAU O SAMOA, I SINI AUSETALIA MA LE LALOLAGI ATOA I TAEAO O ASO SA TAITASI, I LE LEITIO FAAVA O MALO "LE FOFOGA MOOMIA O SAMOA" FM 98 .5.

 

AMUIA LE VALAAU LONA MATAI! AO GALUE PEA I LE AUAUNAGA IA SAMOA MA LE LAOLAGI ATOA I VAVEAO O ASO SA TAITASI.

AMUIA E UA OTI, OTI OI LE ALII.

 

O LEA! E MATOU TE FAASILASILA ALOAIA ATU AI I LE AVA TELE MA LE FAAALOALO,

UA TUUMALO TAUILIILI SEIULI ANERU FAAMOANA……..,

UA TUUMALO TAUILIILI SEIULI ANERU FAAMOANA!

I LE MAOTA GASEGASE I ULUMOTOOTUA I APIA SAMOA, I LE ASO LUA 13 O NOVEMA 2007.

 

UA GASETOTO AI NEI LE MASINA, UA GASOLOSOLO AO, UA TAAPE PAPA, UA PA'U LE MASINA, UA GAUGAU AUT-A

 

O LE LAGIA LAVA LEA O AUFAGA MA LEPA, FEU’U MA TAUTOGOTOGO

I LE AFIO O LE AIGA SALEVALASI.

AFIO TUPUOLA, AFIFIO TAGO MA TAGO

AFIFIO LATOU FALETOLUGAFUA: FALETAGOA'I, LUPESOLIAI MA SAVUSAT-U.

O LE MOA NA VINI MUA!

O LE LAAU TAUTA MALOSI O LE ULUGA TANIFA E TULATOA I LE MAOTA

ALAALATA'I POPO MA TALIMAO, IA MA UPU IA SALEFAO.

 

E! UA GASETOTO LE MASINA, GASOLOSOLO AO, TAAPE PAPA, PA'U LE MASINA, 

UA GAUGAU AUT-A!

 

O LE LAGIA FOI LEA! I LE AFIO O FALETOI MA'OPU TAULAGI MA ALALA I MALAE.

LE ALOALII MA LE AO O FALEUPOLU, SAGALE MA SOGI MA LE TAVAI.

E PUIPUI E TAPAAU O LE ITUMALO, FATIALOFA MA AUELUA O TAMA O LE PUNEFU!

O TULANIU O ATUA MA LAU FETALAIGA MALIELEGAOI, MA UPU I LE TOFI FAASOLO FALEATUA MA SALEFAO!

 

E! UA MALILIU TOA UA MAIMAU AI AUUPEGA O LE TAUA.

UA USUFONO LE SUSUGA IA SEIULI TAUILIILI ANERU FAAMOANA........

UA USUFONO LE SUSUGA IA SEIULI TAUILIILI ANERU FAAMOANA……

 

UA TO LE TIMU, UA TAFEA LE TAUOFE, UA GASOLOSOLO AO, UA TAAPE PAPA!

 

UA LAGIA NEI FEAGAI MA LE ATA MA POUTOA! I LE SUSU LAU SUSUGA I LE MALIETOA NA FAALOGO I AI SAMOA, MA LOU NOFOA VAEVAELOLOA.

SUSU LE AIGA SA MALIETO-A MA LE ALALAFAGA O USOALII.

SUSU TO'OA NA SA'O NA LUA I LO OUTOU ALALAFAGA.

MALIU MAI MAGO MA LUASIUFANUA.

 

E! UA LE NOFOIA LE NOFOA O TAVITA! O SE SA AVEA MA AUAUNA TAUTUA MATAVELA, TAUTUA AFUTOTO, TAUTUA LE FAATUOIA,

I LE MALULU MA LE FESUISUIA'I O LE TAU I TAEAO O ASO SA TAITASI, AE SA LE FAAVAIVAI E AUAUNA MO SAMOA I AUSETALIA, SAMOA LE ATUNUU MA LE LALOLAGI ATOA.  E ALA I FAASALALAUGA A LE LEITIO, MA O S-E SA VAAVAALUA MA LIMA TAUMATAU I AI FAASALALAUGA I VAVEAO O ASO SA TAITASI.

FAAMOEMOEGA UA LE TAUNUU, E MOMO AI LE AGAGA, INA UA E ALU ATU I SAMOA MA E SOLA AI LAVA.

AE UI I LEA! E PULE PEA LE ATUA!

O LE TI’A E LE SEUA, O LE MUA E LE FUATIA, O LE TAO E VELO I LE MANINOA, O LE TA E LE AGAIA, O LE MA’A E TOGI FAATO 

 

TAU IA INA IA MANUIA LAU MALAGA - TAUILIILI SEIULI ANERU FAAMOANA

 

SAINIA LENEI FAALIGA FAANOANOA E AIGA!

 

Sususga ia Peleti Toese Toailoa: Toeaina Faatonu Matagaluega EFKS a Niu Sa Uelese

Susuga Faauuga Logovae: Sea o le Sinoti a Melepone Vitoria

Afioga Tago Falefia Auelua

Afioga Tagaloa Fotu Filipo Tago

Tofa ia Tulatoa Tavita Auelua

Tofa Leafa Nuuausala Fetoai Auelua

Tofa ia Numia Lefaoseu Auelua

Tofa ia Malaeafoa Lale Auelua

Tofa ia Faletolugafua Faalupega Auelua

Tofa Fogavini Safua Tavale.

 

Aemaise le tina faanoanoa ia Soo Tauiliili Seiuli Aneru Faamoana ma le fanau loto faavauvau.

Tofia Rev. Aloese Allan Filipaina mo le International Moderator Aotearoa NZ & Ausetalia

by: Toomata PMaiava
 
Tofia Rev. Aloese Allan Filipaina mo le International Moderator Aotearoa NZ & Ausetalia
 
O le aso sa 21 o Oketopa sa faaiuina ai le fonotaga tele a le Ekalesia Soofaatasi Ausetalia ma Aotearoa Niu Sila, lea sa amata usuia mai i le aso Toonai 20 Oketopa i le talanoaina ma le agai i luma o le galuega talai mo le au kerisiano faatuatua i taitai o le Ekalesia i Aotearoa i Niu Sila faapea foi ma Ausetalia nei.
Sa auai mai ai i lenei fonotaga le susuga i le alii faifeau ia Dr. Joe Goodal mai le setete o Kuiniselani, o Rev. Asi Luaei Siaoloa Ioelu mai Melepone i le setete o Vitoria, o le susuga ia Rev. Joe Ioelu Ioelu mai Niu Sila, faatasi ai ma le faatonu o Autalavou le tamaitai ia Miriama Laumea, o le susuga i le alii faifeau ia Dr. Harry Melkonian, atoa ai ma le susuga i le alii faifeau ia Aloese Allan Filipaina lea o loo ia tausia ma le faletua le Ekalesia i Balmain.
O le susuga ia Dr. Harry Melkonian le taitaifono faava o malo poo le International Moderator o le lotu Soofaatasi a Niu Sila ma Ausetalia (Congregational Federation of Australia and Aotearoa New Zealand) sa ia taitaia le sauniga i le ta tonu lea o le 9:30am i le aso Sa na sei mavae atu nei. I totonu o lenei sauniga mamalu i le malumalu o le Ekalesia Faapotopotoga a St. Andrews i Balmain, sa valaauina faapitoa ai le alii faifeau Samoa ia Rev. Aloese Allan Filipaina mai le afioaga o Vailuutai e susu atu i luma o le faapotopotoga ma na faailoa ane ai e Dr. Harry e faapea.
 
Ua iu le fonotaga ma ua tasi moemoe le filifiliga a le Ekalesia i lana usugafono lona fitu o lenei tausaga 2007 e avea le susuga ia Rev. Aloese Filipaina e fai ma ma taitai fono aoao faava o malo (International Moderator) a le Ekalesia Faapotopotoga Soofaatasi Ausetalia ma Aotearoa Niu Sila, ina ua maea le fa tausaga lea sa taitaia mai ai e le alii faifeau ia Dr. Harry Melkonian.
O se tulaga sa faafetaia ai e Samoa ma ona tagata lolotu o loo i ai i lea itu o le tovine le ausia e se alo o Samoa lea tulaga taualoa faava o malo pei ona tulai mai ai le susuga ia Aloese Filipaina, e le gata i lea ae sa matua viia ma faafetaia e le susuga ia Filipaina le Atua o Sapaota ona ua ia faaaogaina lona tagata ma le auauna vaivai e tautua ai ana feau mo aso oi luma.
I nisi o tulaga mataina sa molimau i ai le sui o talafou o pesega faa-evagelia sa faatinoina e le ekalesia Samoa malaga mamao mai Melepone na momoli faatasi atu ai ma le feau o le faaolataga a Iesu Keriso i papalagi ma-e, e le malamalama i le gagana Samoa.
Sa faaiuina i se taumafataga ma tatala ai loa le filialii ma toe tuuvaaa atu ai loa susuga i alii faifeau ia Rev. Joe Ioelu Ioelu i Niu Sila faapena foi ma le susuga i le alii faifeau ia Rev. Asi Luaei Siaoloa Ioelu lea foi ua filifilia e na te tauavea le tulaga o le taitaifono mo Sini Niu Sa Uelese ma Melepone Vitoria faatasi ai ma faifeau o le Ekalesia Faapotoopotoga Soofaatasi Ausetalia ma Aotearoa Niu Sila lea sa malaga mai Kuiniselani ma isi setete o Ausetalia.
 

OSIGA FEAGAIGA EFKS CONDELL NSW AUSETALIA

 

by: Toomata Pasefika Maiava

 

Osia le feagaiga Rev. Fiti & Mala Fiu Semaia ma le aulotu EFKS Condell Park NSW Ausetalia

 

O le aso Faraile 21 o Setema sa osia ai le feagaiga a le susuga i le alii faifeau ia Fiti Fiu Semaia ma le faletua ia Mara i le avea ma faafeagaiga taulagi e tausia le Ekalesia Faapotopotoga Kerisiano Samoa a Condell Park, ma o le amataga o le sauniga sa taitaia lava e le susuga i le faifeau toeaina o le Pulega a Sini Saute Rev. Taipo Malifa.

E ui o se aso faigaluega le aso tonu na pau i ai le osiga feagaiga a le aulotu ma le latou faifeau ae sa le faatafa le mamalu o le Pulega ma le matagaluega a Niu Sa Uelese i le Toeaina faatonu ia Rev. Peleti Toese Toailoa ma le faletua ia Senetenari faapea le nofoa faafeagaiga ma tagata lolotu uma i le fia auai e molimauina le osiga o le feagaiga tau i le lagi a le aulotu ma le latou faifeau.

Sa mafai foi ona auai mai ai le susuga i le Toeaina faatonu o le matagaluega a Melepone i Vitoria Rev. Amosa Amosa ma faifeau mai Samoa e molimauina le faamoemoe o le susuga ia Fiti ma lona faletua, sa auai ai foi nisi usoa ekalesia e pei o le Uniting Church Samoa i Lidcombe lea o loo tausia e Rev. Sione Eli ma le faletua ia Apoua faapea foi ma le susuga ia Rev. Aloese Filipaina

O le susuga i le alii faifeau ia Fiti o lona tuaa o le tama ia Fiu Semaia mai le afioaga o Sili Savaii, ao lona tina o Fogalele mai le afioaga o Gataivai, o lona faletua o Mara ma ona tuaa o le tama ia Vaipu’a Mo’emo’e Tuiavi’i mai le afioaga o Uafato i Fagaloa ao lona tina o Aumau mai le afioaga o Mutiatele i Aleipata.

 Sa ulufale i laua i le Kolisi faafaifeau i Malua i le tausaga e 1999 ma na faauuina i le tausaga e 2002, o le 2003 sa avea ai ma faiaoga i le Kolisi maualuga a Tuasivi seia oo atu i le 2005 ma malaga mai ai loa i Sini Ausetalia ma le faletua ia Mala ma e toalua o la alo.

O le susuga i le Toeaina ia Taipo Malifa sa ia taitaia ma faataunuuina uma lava tulaga e masani ai le ekalesia Samoa i mea nei o le osiga o le feagiga a le faifeau ma le aulotu EFKS Condell Park, o le susuga i le aoao fesoasoani ia Aigamaua Iosefa Maiava o Utualii ma Avao Savaii ma le faletua ia Ofeira Leapai mai le afioaga o Malie sa tausia le ekalesia seia oo ina tasi moemoe le finagalo saili o le aulotu ua tatau ona osia loa le feagaiga ma lo latou faifeau aua le agai i luma o le galuega ma le faamaopoopoina o agaga o tagata mo le Alii ma lona finagalo.  

O le tofa ia Tiata Umuti Tiata o le failautusi o le ekalesia sa feagai mo faaaloaloga i le Pulega a Sini ma le Matagaluega a Niu Sa Uelese aemaise susuga i Toeaiina ma faafeagaiga. I le faatau paia sa laga faatau le tofa ia Uso peitai sa ave lafo lava le faaaloalo i le Tiakono Toeaina o le Matagaluega NSW le tofa ia Loli Leilua e faia se upu mo le fula ma le mamala lea sa gapatia ma milomilosia i ai le aulotu a Condell Park. Sa fetalai le tofa ia Tiata e toe tali fuaitau i le auvalaaulia ma faafetaia ai le faamanuiaga a Toeaiina ma faafeagaiga sa ofo alofa atu mo le aulotu ma le faafeagaiga fou, fetalai Tiata e ui lava ina fou le osiga feagaiga peitai o i latou o nisi lava o toa manumanu o le ekalesia i le tautuaina i le asaina o le vao filifili ma le atinaeina o nisi o galuega sa galulue ai, ma o le finagalo lava o le Atua ina outou atu i soo se nuu ma soo se afioaga e fai outou ma soo e tauavea le suafa pele o Keriso ma tautua le ekalesia i soo auala e tusa ai ma lona finagalo. 

Sa matua foi le Pulega ma le Matagaluega ma le vaa ua lomi ma le vaa ua goto i faaaloaloga sa faatinoina e le aulotu a Condell Park e faaali ai lo latou valevale alofa ma le tausi feagaiga i le latou faifeau fou

O le Toeaina faatonu o le Matagaluega Niu Sa Uelese Rev. Peleti Toailoa sa saunoa faamanuia ma tatalo mo le manuia o le aulotu ma le latou faifeau i le alo atu mo le galue a le Atua.

 

I le maea ai o le va feagai a le aulotu Condell Park ma le Pulega Sini Saute ma le Matagaluega NSW sa feiloai ai loa le aiga o le faifeau ia Fiti ma Mara Semaia ma lana aulotu e ala i tu ma aga masani o le feosiaiga o feagaiga, ma o le tofa ia Pula Lolua sa fai ma sui o le aulotu ae fetalai le tofa Fiu mai le itu a aiga na lua a le faifeau e molimoli le latou meaalofa ma tulaga uma e masani ai le ekalesia Samoa i mea tau faaaloaloga. I le maitau a le sui o le Samoa Times e muliga foi le osiga o le feagaiga poo le tautoga i le va o le tamaitai ma le alii faaipoipo i tulaga tetele na oo i ai le feiloaiga a aiga na lua a le faifeau ma lana aulotu i Condell Park i teuga faatamalii ma le faatupu sa faatinoina i lea aso Faraile.

Sa tatalo le susuga i le Toeaina faatonu ia Amosa Amosa mai Melepone ma tatala ai loa le filialii.

 

Faia le tufaga faailoga a le Samoan Learning Centre mai Galuega o le 2006

O le aso Toonai o muamua nei 25 o Fepuari o le a faia ai le tufatufaga faailoga a aoga afiafi a le Samoan Learning Centre lea o loo a'otauina ai le toatele o alo ma tama fanau a Samoa mai le 6 tausaga seia oo atu lava i le vasega e sauni ai mo Iunivesete, aemaise le tatalaina o le avanoa mo alo ma fanau o le atunuu, o loo talenia i taaloga ma ai silia i mataupu i totonu o aoga a le malo ma Ekalesia.
I se tala fiafia i se pepa o faamatalaga e faapea e toalima tamaiti Samoa ua faamanuiaina e ulufale atu mo Iunivesete sa koleni ma aoaoina mai i aoga afiafi nei e faapitoa mo fanau Samoa e pei ona saunia e le Fono Faufautua, e toatolu mai le aoga a Canterbury ma le toalua mai le aoga a St. Marys.
E le o faailoaina faalauaitele suafa o i latou nei seia maea le tufaga faailoga i le aso Toonai o muamua nei, ona faatoa mafai lea ona faafofoga ia ai Samoa i le taumafaiga a nei alo o le atunuu.
 
 

Manuia le talosaga mo le lala lona 3 a le Samoan Learning Centre i Macquarie Fields NSW

Ua faamaonia mai nei e le Canterbury Girls High School le toe amatalia o aoga a le Samoan Learning Centre i le Aso Lua 27 o Fepuari 2007 i le 6 seia oo atu i le 8pm ile afiafi, ma o le a amata faatasi lava lea ma le polokalame a matua ua faaigoaina o le Faatofalaiga a Matua.
I lea sailimalo mo alo ma fanau a le Fono Faufautua a Samoa ua sauni nei foi le tatalaina o le vaega lona tolu o lenei aoaoga i le itumalo o McCarthur ma e faia aoga i le James Meehan High i Macquarie Fields lea ua maua ai le avanoa e amataina le Samoan Learning Centre mo itumalo uma ile itu o Macarthur e iai  Campbelltown, Ingleburn, Macquarie Fields, Leumeah ma Liverpool.
O le aso Toonai 17 o Fepuari 2007 ile 6 ile afiafi o le a feiloai ai le Fono ma le mamalu o Samoa o loo afifio ma papaao i lea itumalo mo le faatulagaina ma le tapenapenaina o lenei faamoemoe.
O lenei taumafaiga ale Fono ua faatinoina lava ona ole talosaga mai ale itumalo o Macarthur mo le amataina ose lala ole Samoan Learning Centre ma ole naunauga lava lea ile afioga ile Peresitene, Tagaloa Fotu Filipo Tago male Laulau a Ofisa ina ia faatino lenei talosaga.
I le aoga lona lua i alo ma fanau i le itumalo o Nepean i Dunheved College i St Mary’s,  o le a toe fofogaina atu le paia o Samoa o loo alala ma nopiai i lea vaega o le setete mo le aso e faataunuuina ai a latou aoaoga i le Samoan Learning Centre.

Aloaia le Fono Faufautua a Samoa i Sydney e le Malo NSW

Auai le afioga Tagaloa Tago - Peresetene Fono Faufautua Samoa Sydney (SAC)

Talafou aso Sa 11 o Fepuari 2007   
1). O le taeao o le aso Tofi 8 o Fepuari 2007 na faatasi atu ai le peresetene o le Fono Faufautua a Samoa i Sini, le afioga ia Tagaloa Filipo Fotu Tago i le maota o le Palemene a le setete lenei o Niu Sa Uelese, e tali valaau atu ai i le faaaloalo na tuuina mai e le afioga i le Fofoga Fetalai o le Maota le alii o Honournable John Aquilina.
O lenei valaaulia sa manaomia ai se sui mai le faalapotopotoga a Samoa i le aai o Sini e molimauina faatasi ma taitai o isi faalapotopotoga atunuu eseese o loo aumau ma nonofo i totonu o Ausetalia, ma o lea faamoemoe o le tufaga faailoga e tuuina atu i ai latou ua afu le latou tautua mai faalapotopotoga e fia i totonu o le setete aemaise le tauatinaeina o latou atunuu e aunoa ma se totogi poo se taui e tuuina atu e le malo tele i se tino i tupe.
E maeu foi le tautua afutoto o nisi o taitai sa auai atu i lenei faamoemoe, ona o le tele o taimi e totogiina lava i a latou lava tupe mea e fai mo le faamaopoopoina o faalapotopotoga a latou atunuu ma sosaiete tumaoti, ma le naunautaiga ina ia maua le loto faatasi ma le galulue felagolagomai tagata o se atunuu ao nopiai ai i totonu o Ausetalia.
I se saunoaga tuusao a le afioga i le Fofoga Fetalai o le maota John Aquilina, na ia faaali manino ai le agaga faafetai tele i ai latou o loo taitaia faalapotopotoga a latou atunuu ona o le galuega e faigata ma tele faafitauli pe a le lava le onosai i nisi o taimi, aemaise ai le ofoina atu o a latou lava tupe e totogi ai soo se faamoemoe ma le tele o taimi e tautua ai lona lava atunuu e aunoa ma le faalogologo tiga.
 
I lea lava saunoaga sa folasia ai se lipoti e faailoa ai le tusa ma le 6 miliona tagata o loo ofoina atu o latou taimi e faia ai lea ituaiga tautua e aofia ai ma Samoa i le aunoa lava lea ma se totogi mai le malo, o se fuainumera te-le atu nai lo le aofaiga o tagata Samoa i totonu o lo tatou atunuu poo lo tatou Tofi, aemaise ai pe a faatusa i le aofaiga o tagata o loo i totonu o le setete o Niu Sa Uelese; lea e ova atu ma le 20 miliona.
E 42 piliona tala e faaalu e le malo mo le faatinoina o galuega tauatia'e mo le faaleleia o soo se faalapotopotoga i totonu lava o le setete o Niu Sa Uelese.
Sa faaiuina i se iputi na saunia e le afioga i le Fofoga Fetalai o le maota Hon. John Aquilina i totonu lava o le fale o le palemene a Niu Sa Uelese ma tatala ai loa le filialii. Saunoa le afioga ia Tagaloa Tago le peresetene o le Fono a Samoa, o se avanoa lelei tele lenei e faalauiloa atu ai pea le Fono Faufautua a si o tatou atunuu laitiiti i le li'o o loo i ai isi atunuu tetele lea o loo aumau i totonu o Ausetalia, aemaise ai o le saili mai ai o nisi o fesoasoani e tauatia'e ai le mafutaga a Taga Samoa i totonu o le aai o Sini.

Tatalaina CD pese lotu EFKS Rooty Hill Sini Ausetalia

O le siufofoga tauvivii o soo se Samoa i totonu o Ekalesia e le taumateina le aoga o latou leo e usuina ai viiga o le Atua ma o le auga ma le faamoemoega lava lea a soo se alo fanau Samoa mo le Alii i lea itu o le galuega talai.

O le susuga i le alii faifeau ia Rev. Uikilifi Vaifale ma le faletua ia Sieli o matua faaleagaga o le Ekalesia EFKS i Rooty Hill i totonu o le setete lenei o Niu Sa Uelese, ua lauiloa le la galuega talai faamisionare i totonu o Aferika i ni tausaga ua alu. I lo la liliuina lea o fanau talavou i totonu o Ekalesia i setete e fa i Aferika ina ia mafai ona usuina ai viiga faaSamoa i le Atua e pei ona i ai le pese "Tatou te olioli tatou te Faafetai ma tele o fatuga a le EFKS o loo usuina e tamaiti Aferika i le gagana Samoa.

E le gata la i nei taumafaiga i le susuga ia Vaifale ma lona faletua ae ua faalauiloa ma faalautelenei mai foi le tatalaina o se tasi lenei o vaega lona lua o lana taumafaiga i le faapine faamauina o viiga o le Atua i totonu o le EFKS i Rooty Hill Sini Ausetalia i le CD fou a le Aufaipese i lenei seneturi 21.

E momoli ai le faamalo ma le faafetai a Samoa i lenei auauna a le Atua le susuga ia Kirifi ma le faletua ia Sieli i lo la maelega e atia'e mea lelei ma mea silisili mo le viiga o le Atua soifua

Ulua'i Fonotaga Fono Faufautua Tagata Samoa Sydney 2007

O le susuga ia Pastor Seiuli TTusitala Va'a o le faafeagaiga o le AOG a Parramatta sa tatalo amata mo le usuia o le ulua'i fonotaga a le faalapotopotoga a Tagata Samoa i Sini le Fono Faufautua i le afiafi o le aso Sa 28 o Ianuari 2007.

Na sosoo ma le saunoaga faafeiloai a le peresetene o le mafutaga le afioga ia Tagaloa Tago, ona faagasolo ai lea o le fono mamalu a le atunuu.

E tele ni mataupu lelei sa talanoaina mo le manuia agai i luma o tagata Samoa o loo afifio ma papa aao i lenei vaega o le kelope, aemaise lava le auga o aute o le sailimalo o ana tama fanau mo manuia o aiga, nuu, Ekalesia faapea malo o loo tu'i mai le mulipapaga i Samoa mo le alo faiva i atunuu ese.

I lea lava fono mamalu sa tulai ai le sui o le matagaluega o aoaoga ma le punavai mo fanau Samoa le afioga ia Tuioti Tino Tiufea, e faalauiloa le aso ma le taimi e toe amatalia ai le aoaoga afiafi i vaiaso taitasi pe a tuua mai aoga masani a le malo ma Ekalesia; o se tasi lenei o manulauti ma le atinae manuia mo fanau Samoa i le aai o Sini ona ua mafai ona faatinoina i totonu o lenei malo tele.

I se tala fiafia e faaopoopo i lenei lipoti na saunoa ai Tuioti i le tulaga o le taliaina o se isi foi lala a le Samoan Learning Centre o le a tatalaina i le itumalo o McCarthur i le itu i Matu i Sisifo o Sini. O le tolu ai lenei o lala a le Samoan Learning Centre ua tatalaina talu ona faavae lenei atinae i lona tau amata mai i le nuu o Canterbury, seia oo atu i lona lala lona 2 i le itumalo o St. Marys-Mt.Druitt, ma le lona tolu lenei i le itumalo tele o Campbelltown lea e toatele le mamalu o Samoa o loo alaala ma afifio ai. I le lumanai o nei aoga afiafi o le'a faaofi ai ma le aganuu i le gagana Samoa e aoaoina ai tamaiti o loo manaomia lea fesoasoani, ina ia tapasaina ai lava i latou i le tu ma le aga i fanua e masani ai le tama ma le teine aoga ie pei ona aoaoina ai e matua Samoa i le faaaloalo ma le ava i soo se tagata.

Sa pasia ai foi i lea lava fonotaga le toe iloiloina o le Faavae ma ia toe teuteuina mo le saogalemu o le mafutaga i aso o i luma aemaise le tupulaga faia'e o le lumanai o Samoa i Ausetalia, ina ia malu puipuia i osofaiga ma faiga faafelavei pei ona le 'o po se lilo i le silafia e Samoa tausaga ua mavae.

I tau faaiuiuga o le fono na tulai ai le tofa ia Samoata Lemalu mai le afioaga o Pu'apu'a i Savaii ma Lefaga e faafetaia le peresetene ia Tagaloa Tago ma lana laulaua fono i le onosai ma loto tetele i faafitauli sa faafeagai ai i tausaga ua alu, aemaise le momoli mai o le soifua laulelei o Samoa i le amataga o feau ma galuega o le 2007.

O le Faufautua Faale-Tulafono, le susuga i le toeaina ia Fosi Palaamo o le Ekalesia a Bankstown sa tatalo faaiu ma faamanuia ai ia Samoa i le alo faiva i feau ma galuega amata o lenei tausaga fou 2007 ma tatala ai loa le filialii.

Toe Auli ma Faamafolafola Lelei le Fono Faufautua Samoa Sydney 2007

O le sailimalo o Samoa i atunuu i fafo o se mitamitaga tele lea pe a solosolo manuia ni taumafaiga ma faaeaea ai i le suafa pele o Samoa i soo se itu o le lalolagi, ae a faaletonu ma fetotoa'i ona tagata ona faanoanoa ai lea o le tapuaiga mau i nuu ma alalafaga o loo tapuaia faiva alofilima a soo se Samoa o loo aumau i atunuuese.
I se saunoaga a le peresetene a le Fono Faufautua a Samoa i le aai o Sini afioga Tagaloa Fotu Filipo Tago i le sui o talafou i le aso ananafi na ia faaalia ai, o le Agavatau lea ma o se faalepo foi ua sauni atu nei i ai le Fono Faufautua a Tagata Samoa i le aai o Sini e toe auli ma faamafolafola nisi itu tino o le mafutaga na matua masofasofa ma malepelepe i le osofaiga sa faia e nisi lava foi usoa a Samoa i ni tausaga e lei mamao atu.
Faaalia e Tagaloa le faamaoniga o lea saunoaga i le tau toe polesiina o le Fono mamalu a le atunuu afua mai i le fonotaga o le a faia i le aso pe a maea sauniga lotu, ona ua leva ona faaaugagase ma saili fofo e tau foia ai le gasegase semanu e fano ai le mafutaga, sa faavaeina e toa manumanu o le Talalelei le susuga ia Faatoese Auvaa o le Ekalesia Metotisi ua lagomau mai i ti'asa, le uluai taitaifono a le Fono Faufautua, o le susuga i le Toeaina ia Fosi Palaamo o le Ekalesia Faapotopotoga Kerisiano Samoa le taitaifono lona 2 na sosoo atu ai; faatasi ai ma le lagolagosua a Ekalesia Katoliko, Ekalesia Soofaatasi poo le Uniting Church, Ekalesia Mamona, Ekalesia AOG ma le tele o isi Tapuaiga Samoa sa opogi faatasi lenei mafutaga mo se feiloaiga mafanafana a Samoa potopoto i totonu o le aai o Sini.
I se feiloaiga a talafou ma le afioga ia Tagaloa na tuuina mai ai i lima o le au tusitala le kopi o le tusi mai le Fair Trading poo le matagaluega lea a le malo tele o loo resitala ai le Fono a Samoa e faamanino ma faamautuina ai le tofia aloaia o le afioga ia Faamausili Taiva Ah Young e avea ma Public Officer e afua mai i le aso 20 o Aokuso 2006 tausaga na sei mavae atu nei. E le o po se lilo o lea tofiga na matua ofo ai le matagaluega ona e tasi le tausaga ae faafa ona sui sui atu suafa o tagata e tauaveina lea tofiga, ma ua nini faatasi ai saito ma le titania pei ona faia e le au au au saito.
O lea foi tusi ua matua faamanino mai ai lava le le aia o le matagaluega i nisi o feeseeseaiga sa feagai ai ma le mafutaga a Samoa i tausaga ua alu, ma ua pine faamau ai i le amataga o le tausaga mai ia Ianuari 2007 i le fono mamalu a le atunuu, ua tatau loa ona faatuatuanai ni futia ua alu ae sagai ane loa ai o le Tai e saili se manuia mo Samoa ma ona tagata i totonu o le laumua o Sini.
Faamoemoe o le afiafi a nanei o le a uluai usuia ai le fonotaga muamua o lenei tausaga e faagasolo ai polokalame a le Fono Faufautua lea e faatauaina tele ai alo ma fanau aoga e alualu i luma o latou taumafai i totonu o aoaoga, ia le gata i mataupu ae faapena foi ona faatauaina i latou o loo lauiloa i soo se taaloga i totonu o Ausetalia.
O le fonotaga foi lenei o le a iloa ai le aso e toe amata ai aoga afiafi e lua a le Fono o loo ua faatutuina i le nuu o Canterbury ma le aai o St. Marys - Mt.Druitt lea e toatele ina afifio ma papaaao ai soo se Samoa.

Faamanatuina 65 Tausaga Faumuina Oliana Mulipola Laupepa

O le po o le aso Toonai 13 o Ianuari i le amataga o le tausaga nei sa faailogaina ai le atoaga o le 65 tausaga o le soifua o le tina matua poo le afioga ia Faumuina Oliana Mulipola Laupepa mai le afioaga o Gagaifo Lefaga ma Mulifanua i totonu o le aai o Sini Niu Sa Uelese.
O le susuga ia Bishop Kome mai le Ekalesia Mamona i Bankstown sa ia momoli lapalapa o malo faatasi ai ma le lagolagosua o le susuga i le Toeaina o le Pulega Sini Saute o le Ekalesia EFKS mai Bankstown susuga ia Fosi Plaamo, faapea le susuga ia Pastor Seiuli Tusitala Va'a mai le Ekalesia AOG a Parramatta, na maualuga ai le viiga o le Atua ina ua aulia mai e le afioga ia Faumuina le 65 tausaga o lona soifuaga.
Sa faatasi mai ai lona tina ia Vitoria Mulipola, malaga mai Amerika faapea ona uso ia Ivy Logo o le faletua o le pule o le Polynesian Centre i Hawaii faatasi ai ma Gasetoto Tanuvasa, faapea Oketi Taulaga ma Daisy Malaga ma ona aiga uma i le fia molimauina o le faamanatuina o lona aso soifua.
O le faletua ia Ivy Logo Apelu sa molimau e fai ma sui o si ona tina ia Vitoria i le mafutaga ma Faumuina, ao lona alo matua ia Danny Noa Ioane Laupepa sa molimau e fai ma sui o le fanau.
Tele ni faafiafiaga sa saunia lava e fanau o lana fanau faapea nisi e siufofoga malie i mea tau le taleni o le leo lelei lea sa usuina ai e lona alo ia John se pese faapitoa e aualofa ai i lona tina.
O le faletua ia Faleono Toala o se tasi o tina siufofoga malie mai le leitio o le Puleono i Salafai sa faatinoina foi lana taleni i lea po aemaise le siufofoga malie o le susuga ia Papalii Tuala i lana pese o le "Sa ou taoto i le Po poo le Lamepa Susulu"
O le molimau a sui o talafou i le aso soifua o le afioga ia Melega a le Nu'u poo Fiti ma le Afa, ua taunuu ai upu: se mea ina manaia o fiafiaga faatamalii ma suaga faafaleupolu na oo i ai faafiafiaga i lea po; aemaise le tulai o le susuga i le Toeaina ia Palaamo, Misionare ia Sinei Ah Yek, Lupe Tanoi ma le teine fai aso fanau e usu le tali o le pese a Papalii i le pese lauiloa a le atunuu le "Eleele ua le malie i Vai.
O le afioga ia Toomata P.Maiava Leota mai le Aiga Sa Peseta sa fai ma fofoga o lea po, ma na faaiuina le aso soifua o Faumuina i le manuia, ina ua fetalai le tofa ia Samoata Lemalu e fai ma fofoga o le auvalaaulia faapea Samoa potopoto e faafetaia ai le fula ma le mamala faapea faaaloaloga maualuluga na saunia e ona alo ma le aiga alii o le teine faiaso fanau ia Faumuina Oliana Mulipola Laupepa

Faafetaia e Malietoa Tanumafili ll Samoa i Ausetalia

Tusi Faafetai Malietoa Tanumafili ll i le Fono Faufautua a Samoa i Sydney NSW

O le soifua ma le sailimalo o Samoa i atunuu i fafo, o se mitamitaga tele lea i ona tagata ma lona atunuu o loo faamuli mai i laufanua ma eleele poo le Tofi mai le Atua; aemaise pe afai o faia pea le faiva a le Isaraelu moni o le susue lea o le faamalama ma vaavaai atu i lona atunuu na soifua ma ola mai ai.

I se tusi o loo taulimaina e le vaega o talafou o loo faaalia ai le agaga faafetai mai le Ao mamalu o le malo o Samoa, Afioga i le Tapaau Faasisina, susuga ia Malietoa Tanumafili le ll, e fa'ao'oina mai i tagatanuu uma o Samoa o loo afifio ma papaaao i totonu o Ausetalia e faaleoina ai lana faafetai tele, aemaise le mafutaga a le Fono Faufautua a Tagata Samoa i le aai o Sini i le setete o Niu Sa Uelese.
Ona o le meaalofa sa tuuina atu o se teu fugalaau, tupe $1000 afe tala ma le tusi o loo faaupua:
"E saga faafetaia pea le alofa o le Atua i lau afioga i le Ao mamalu o le malo o Samoa - Lau Susuga Malietoa Tanumafili le ll, ina ua e aulia mai le 95 tausaga o lou soifua" lea sa faamanatuina i le aso 4 o Ianuari 2007.
Alofaaga ma faamanuiaga mai tagata Samoa uma i Ausetalia aemaise lana Fono Faufautua i Sini.
 
(Samoan Advisory Council Sydney Incorporated)
 
Afioga Tagaloa Tago - Peresetene
Susuga i le Toeaina Fosi Palaamo - (Faufautua Faale-Tulafono),
Taumualasi Sitagata Sui peresetene),
Faamausili Ah Young-(Failautsui ma le Alii ofisa o le va fealoai),
Tulaga Toleafoa-(Teutupe)
Orepa Mualaivao (Sui teu tupe).
 

Click here for RSS feed